Малдарҙы тамғалау мотлаҡ буласаҡ

Былтыр Туймазы һәм Бүздәк райондарында таралған бешмә сире күптәрҙе хафаға һалды. Ауырыуҙың эҙемтәләрен бөтөрөү барышында 1700 баш мал, нигеҙҙә, һыйыр, кәзә, һарыҡ юҡ ителде. Киләсәктә был ауырыуҙы булдырмаҫ өсөн республика Хөкүмәте саралар планын раҫланы. Тап шул маҡсаттан 2019 йылдың аҙағына тиклем төбәктәге барлыҡ мал-тыуарҙы иҫәпкә алыу һәм идентификациялау бурысы ҡуйылған.

Бөгөн был юҫыҡта 18 йүнәлештә эш алып барыу ҡаралған. Ауыл хужалығындағы малдарҙы хәреф һәм һандар ярҙамында идентификациялау, был мәғлүмәттәрҙе берҙәм федераль реестрға индереү – шуның береһе. Хәҙер һыйырға, атҡа, кәзә-һарыҡ һәм бүтән йорт хайуандарына махсус биркалар ҡуйыласаҡ. Көтөүҙе күҙәтеүгә алыуҙы ойоштороу, идентификацияланмағандарын күҙ уңынан ысҡындырмауға, Ҡорбан байрамы мәлендә оло юлда постар һәм рейдтар булдырыуға, мал табиптарының белемен камиллаштырыуға етди иғтибар биреләсәк.

Башҡортостандың Ветеринария идаралығының бүлек начальнигы Руслан Байҡаев әйтеүенсә, бөгөн республикала малға бирка ҡуйыу башланған. Ә бешмә теркәлгән Туймазы, Шаран, Бәләбәй, Бүздәк райондарындағы хужалыҡтарҙа, шәхси ихаталарҙағы мал идентификацияланған.

Әлегә малдарҙы иҫәпкә алыу ирекле булһа ла, бөгөн Ауыл хужалығы министрлығында махсус бойороҡ әҙерләнә. Ул апрель айында үҙ көсөнә инһә, тамғалау мотлаҡ тип ҡабул ителәсәк.