Лайыҡлыларға – дәүләт наградаһы

Төрлө иҡтисад, социаль өлкә, мәҙәниәт һәм спорт тармаҡтарынан 49 вәкил ордендар, маҡтау грамоталары, исемдәр һәм рәхмәт хаттары менән билдәләнде. Улар араһында яҡташтарыбыҙ ҙа булыуы ҡыуаныслы – Республика йәштәр социаль-психологик һәм мәғлүмәт-методик йәштәр үҙәгенең Төньяҡ филиалы мөдире Роза Ҡыямова – Башҡортостан Республикаһы Почет грамтаһы менән бүләкләнһә, БР “Үҙәк” МТС-ының Дыуан районындағы филиалы агрономы Нуриәхмәт Ҡотошов “БР-ҙың атҡаҙанған ауыл хужалығы хеҙмәткәре” исеме бирелде.

Тантана барышында Республика Башлығы Рөстәм Хәмитов Таңсулпан Ғарипованы “Башҡортостандың халыҡ яҙыусыһы” тигән маҡтаулы исем менән бүләкләне. Таңсулпан Ғарипова — Зәйнәб Биишеванан һуң ошо абруйлы исемде алған икенсе ҡатын-ҡыҙ яҙыусы.

— Был минең өсөн бик тулҡынландырғыс булды. Проза яҙыу — ауыр хеҙмәт, бигерәк тә ҡатын-ҡыҙ өсөн. Бер яҡтан, үҙем, икенсенән, әлеге көндө көткән уҡыусыларым өсөн шатмын. Ошо дан әҫәрҙәремде уҡыусыларға, халҡыма кәрәк, — тине яҙыусы.

Республика Башлығы тантанала ҡатнашыусыларҙы лайыҡлы наградалары менән ҡотланы һәм эштәрендә артабан да уңыштар теләне.