Йоностар ни хәлдә?

Мәсетле районы хакимиәте башлығы Әнис Әсәҙуллин халыҡ менән осрашып уларҙы борсоған мәсьәләләрҙе хәл итеү маҡсатында эш сәфәре менән Йонос ауыл советында булды. Сәфәр барышында Әнис Ҡасим улы фельдшер-акушерлыҡ пунктында медицина хеҙмәткәрҙәре һәм пациенттар менән әңгәмәләште.

-ФАП-та яҡты, таҙа һәм уңайлы. Иң мөһиме, бында медицина хеҙмәткәрҙәренең күңел йылылығы тойола. Күптән түгел уларҙың тормош иптәштәре тырышлығы менән бинаға косметик ремонт яһалған, - тине Әнис Әсәҙуллин.

Йонос ауыл мәҙәниәт йорто ла район башлығының иғтибарынан ситтә ҡалманы.

-Бинаға етди ремонт талап ителһә лә, хеҙмәткәрҙәр төшөнкөлөккә бирелмәй. Уларҙың оптимизмы, тырышлығы, эштәренә тоғролоғо һәм һөйөүе ҡыуандыра. Мәҙәниәттә осраҡлы кешеләр булмай, был эш талантлы һәм хисле кешеләр эше, - тине мәҙәниәт хеҙмәткәрҙәренә рәхмәтен белдереп Әнис Әсәҙуллин.

Ауыл активы менән осрашыу мәктәптә үтте. Район хакимиәте башлығы халыҡты борсоған һәр һорауға етди һәм тулы яуап, аңлатма бирҙе. Урамдарҙы яҡтыртыу, сүп-сар сығарыу, эскелек кеүек мөһим һорауҙар ҡаралды. Һәр һорау теркәлеп, контролгә алынды.

А. Ишмөхәмәтова.

Мәсетле районы.