Уҡытыусы ҡайҙа яҡшы йәшәй?

Рәсәйҙә уҡытыусыларҙың хеҙмәт хаҡы иң юғары һәм иң түбән төбәктәр исемлеген төҙөнөләр.

Мәҫәлән, Башҡортостанда мәғариф хеҙмәткәренең уртаса эш хаҡы 31 мең 361 һум, төбәк буйынса иһә уртаса хеҙмәт хаҡы – 29 мең 779 һум, нисбәт 105 процент тәшкил итә. Мәскәүҙә уҡытыусылар 89 мең 644 һум ала, илдең баш ҡалаһында уртаса айлыҡ эш хаҡы – 70 мең 680 һум, нисбәт – 127 процент. Күрше Татарстанда был күрһәткестәр уртаса 38 мең 409 һум һәм 30 мең 949 һум, нисбәт – 124 процент. Башҡортостан ошо тармаҡтағы эш хаҡы дәүмәле буйынса 47-се, республикалағы уртаса хеҙмәт хаҡы менән уҡытыусыныҡы араһындағы нисбәт буйынса 52-се урынды биләй.

Уҡытыусыларҙың иң күп эш хаҡы Чуткот автономиялы округында – 96,47 мең һум (төбәк буйынса уртаса хеҙмәт хаҡынан алты процентҡа күберәк). Тәүге биш төбәк иҫәбенә шулай уҡ Ямал-Ненец автономиялы округы (91,3 мең һум), Мәскәү (89,64 мең һум), Сахалин (84,78 мең һум) һәм Магадан өлкәләре (79,54 мең һум) инә.